மறைக்கப்படும் தமிழ் மொழி வரலாறு பகுதி 2

மறைக்கப்படும் தமிழ் மொழி வரலாறு பகுதி 2 | தமிழ் தக்கார் | முழு காணொளி

வீழ்ச்சிப் பாதையில் தமிழ் மொழியும் தமிழர்களும்” என்ற முதல் பகுதியில், தமிழ் மொழிக்கும் தமிழர்களுக்கும் இருக்கும் பிரச்சினைகள், அவர்கள் எதிர்கொள்ளும் சவால்கள் என்னென்ன என்பதைப் பார்த்தோம். அதன் தொடர்ச்சியாக, இந்தப் பகுதியில் தற்போது தமிழ் மொழியையும் தமிழர்களையும் பாதிக்கும் நிகழ்வுகள் என்னென்ன நடைபெறுகின்றன என்பதைப் பார்ப்போம். கடந்த 2,000 ஆண்டுகளாக இரு மொழிகளுக்கு இடையே ஒரு நீண்டகாலப் போராட்டம் தொடர்ந்து நடைபெற்று வருகிறது என்றால், அது தமிழ் மொழிக்கும் சமஸ்கிருதத்திற்கும் இடையேதான். சமஸ்கிருதம் பேச்சுவழக்கில் இல்லாத ஒரு மொழியாக இருந்தாலும், தமிழ் மொழிக்கு எதிராகத் தொடர்ந்து செயல்பட்டு வரும் நிலையே காணப்படுகிறது. தொல்லியல் அறிஞரான R. நாகசாமி, திருக்குறள் வேதங்களிலிருந்து வந்தது என்ற கருத்தைத் தெரிவித்து, தமிழ் மொழியின் மீது அவதூறு பரப்பினார். இதற்கு முன்னதாக, அவர் தமது The Mirror of Tamil and Sanskrit என்னும் நூலில், தமிழ் மொழி சமஸ்கிருதத்திலிருந்துதான் உருவானது என்ற கருத்தை முன்வைத்து, அதற்கு ஆதாரங்களாகக் கூறப்பட்டவற்றையும் வெளியிட்டிருந்தார்.

இதற்கு முன்பும், தற்போதும் தொடர்ந்து, “தமிழ் ஆய்வுக் கட்டுரைகள்” என்ற பெயரிலும் சில நூல்களிலும், தமிழ் மொழிக்கு எதிரானதாகக் கூறப்படும் கருத்துகளையும் கதைகளையும் முன்வைத்து, உண்மையான வரலாற்றைத் திரித்தும் மாற்றியும் எழுதி வெளியிட்டு வருகிறார். இவரது கருத்துகளுக்கு மறுப்புத் தெரிவிக்கும் வகையில், தமிழறிஞர் தமிழண்ணல் தலைமையில் ஒரு குழு செயல்பட்டு, “இரா. நாகசாமியின் பழுதடைந்த கண்ணாடியும் பார்வைக் கோளாறுகளும்” என்னும் மறுப்பு நூலை வெளியிட்டுள்ளனர். அந்த மறுப்பு நூலில், பிற வரலாற்று நூல்களிலும் சங்க இலக்கியங்களிலும் இடம்பெற்றுள்ள ஆதாரங்களை வரிக்கு வரி சுட்டிக்காட்டி, பல ஆதாரங்களை முன்வைத்துள்ளனர். அந்த நூலில், R. நாகசாமி முன்வைத்த கருத்துகள் எந்த அளவுக்கு உண்மைக்குப் புறம்பானவை என்பதைத் தமிழண்ணல் ஆதாரங்களுடன் நிரூபித்துள்ளார். ஒரு மொழியின் வரலாறு என்பது வெறும் மொழியின் வரலாறு மட்டுமல்ல; அது அந்த மொழியைப் பேசிய மக்களின் வரலாறும், பண்பாடும், அடையாளமும் இணைந்த வரலாறாகும்.

இதையும் பார்க்க: மறைக்கப்படும் தமிழ் மொழி வரலாறு பகுதி 1

தமிழ் வரலாற்றைத் திரிக்கும் முயற்சிகள்:

மாற்றி எழுதப்படும் தமிழர் வரலாறு:

R. நாகசாமி தொல்லியல் துறை அறிஞர் என்ற தனது அடையாளத்தைப் பயன்படுத்தி, தான் கூறுவது வரலாற்று உண்மைகளே என்ற பிம்பத்தை உருவாக்கி, பிறநாட்டு மொழியியல் மற்றும் தொல்லியல் துறை அறிஞர்களை நம்ப வைப்பதற்காக இத்தகைய உண்மைக்குப் புறம்பான கருத்துகளை முன்வைத்து ஆங்கிலத்தில் நூலை வெளியிடுகிறார். சமஸ்கிருத மொழியை எப்படியாவது இந்தியாவின் முதல் மொழியாகக் காட்ட வேண்டும் என்பதற்காக, இவ்வாறு வஞ்சகத்துடனும் பொறாமையுடனும் தமிழர்கள் மீதும் தமிழ் மொழியின் மீதும் வெறுப்புணர்வை வெளிப்படுத்துகிறார். இவர் கடந்த 35 ஆண்டுகளாகத் தமிழ்நாடு தொல்லியல் துறையில் பணியாற்றியிருந்தாலும், 2012 க்கு பிறகுதான் இத்தகைய கருத்துகளைக் கொண்ட நூலை வெளியிட்டுள்ளார். மத்திய அரசு 2018-ல் இவருக்கு பத்ம பூஷண் விருதை வழங்கியது.

செம்மொழித் தமிழாய்வு நிறுவனம் மத்திய அரசின் கட்டுப்பாட்டில் செயல்பட்டு வருகிறது. இந்த நிறுவனத்திற்கு போதுமான அளவு நிதி ஒதுக்கப்படுவதில்லை. குறைந்த அளவு நிதி ஒதுக்கப்பட்டாலும், அந்த நிதியைச் சரியான முறையில் தமிழ் வளர்ச்சிக்குப் பயன்படுத்துவதில்லை என்ற குற்றச்சாட்டைத் தமிழறிஞர்கள் முன்வைக்கின்றனர். அதுமட்டுமின்றி, இத்தகைய நிறுவனங்களில் பணியாற்றும் உயர் அதிகாரிகள் நடுநிலையுடன் செயல்படுவதில்லை என்றும் குற்றச்சாட்டுகள் முன்வைக்கப்படுகின்றன. அதற்கு மாறாக, ஒருதலைப்பட்சமாக சமஸ்கிருதத்திற்கு ஆதரவான கருத்துகளை ஆதாரங்களாக முன்வைத்து, வரலாற்றை மாற்றி எழுதும் முயற்சிகளில் தொடர்ந்து ஈடுபடுகின்றனர். இத்தகைய கருத்துகள் தொடர்ந்து முன்வைக்கப்படும் நிலையில், அவற்றின் பின்னணியில் உள்ள வரலாற்று ஆதாரங்கள் என்ன என்பதையும், அவற்றுக்கு எதிராக முன்வைக்கப்படும் மறுப்புகள் என்ன என்பதையும் நாம் கவனமாக ஆராய வேண்டிய கட்டாயம் ஏற்படுகிறது.

ஆய்வுக்காகக் காத்திருக்கும் தமிழர் வரலாறு:

கீழடி அகழாய்வுப் பணி முடக்கப்பட்டதற்கான காரணம், அதற்குப் போதிய நிதி ஒதுக்கப்படாததே என்று கூறப்பட்டது. இதற்கு கடுமையான கண்டனங்களும் எதிர்ப்புகளும் கிளம்பிய பிறகுதான், மீண்டும் நிதி ஒதுக்கப்பட்டு, பணிகள் தொடங்கியது என்பதை நாம் கவனத்தில் கொள்ள வேண்டும். மத்தியிலும் மாநிலத்திலும் யார் ஆட்சிக்கு வந்தாலும், ஆதிச்சநல்லூரில் தொடங்கி தற்போதைய கீழடி அகழாய்வு வரை, ஏன் ஆய்வு முடிவுகள் முழுமையாக வெளியிடப்படவில்லை என்ற கேள்வியை எழுப்ப வேண்டிய இடத்தில், அனைத்துக் கட்சிகளும் மௌனம் காக்கின்றன. அதுமட்டுமின்றி, தமிழ்நாட்டில் இதுவரை கண்டெடுக்கப்பட்ட 75% கல்வெட்டுகள் ஆராயப்படாமல் இருக்கின்றன; அவற்றின் படிகூட எடுக்கப்படவில்லை. நாம் அறிந்திருப்பது வெறும் 25% வரலாறு மட்டுமே; மீதமுள்ள வரலாறு இன்னும் முழுமையாக வெளியிடப்படாமல் இருக்கிறது.

இவ்வாறு நம்முடைய வரலாற்றை அறிந்து கொள்வதற்கான முதன்மையான ஆதாரங்களே முழுமையாக ஆய்வு செய்யப்படாமல் இருக்கும் நிலையில், தமிழர் வரலாற்றின் பெரும்பகுதி இன்னும் வெளிச்சத்திற்கு வராமல் இருப்பது கவலைக்குரியதாகும். இங்கு திமுகவும் அதிமுகவும் தங்களுடைய கட்சியைக் காப்பாற்றிக் கொள்வதற்கும், ஆட்சியைக் கைப்பற்றுவதற்குமே 50 ஆண்டுகளாகத் தொடர்ந்து போராடும் நிலையில் உள்ளன. சில பிரச்சினைகளுக்கு, சில நேரங்களில் மட்டும் தமிழுக்காகக் குரல் கொடுத்துவிட்டு, பெரும்பாலான நேரங்களில் கட்சிப் பணி மற்றும் ஆட்சியைப் பற்றிய சிந்தனையிலேயே மூழ்கியிருக்கின்றன. இதனால்தான், மறுபுறம் தமிழர் வரலாறும் தமிழ் மொழியின் பெருமையும் திசைதிருப்பப்பட்டு, சமஸ்கிருதமயமாக்கப்படுகின்றன. ஆங்கிலேயர்கள் கூட நம்மிடம் இருந்த வளங்களைக் கொள்ளையடிப்பதற்காக நம்மை அடக்கி ஆண்டார்களே தவிர, தமிழ் மொழியை அழிப்பதற்காகவோ அல்லது தவறான வரலாற்றைப் பரப்புவதற்காகவோ அவ்வாறு செய்தனர் என்று கூற முடியாது. அதற்குப் பதிலாக, தமிழ் மொழியைக் கற்றுக்கொண்டு, தமிழ் மொழியின் பெருமையைப் பிற நாடுகளும் அறியும் வகையில், தமிழ் நூல்களை ஆங்கிலத்தில் மொழிபெயர்த்து வெளியிட்டுள்ளனர். அதில் குறிப்பிடத்தக்கவர்களாக எல்லிஸ், கால்டுவெல், ஜி. யு. போப், வீரமாமுனிவர் முதலியோரை குறிப்பிடலாம்.

உண்மையான வரலாற்றை மீட்டெடுப்போம்:

கடந்த 2,000 ஆண்டுகளாக இந்தியாவில் இருந்துகொண்டு, தமிழ் மொழிக்கு எதிராக சமஸ்கிருதம் தொடர்ந்து செயல்படுவது வேதனைக்குரியது. இவ்வாறு உண்மைக்குப் புறம்பான கருத்துகளை முன்வைப்பதன் மூலம், சமஸ்கிருதத்தை முன்னிலைப்படுத்தும் வகையில் தொடர்ந்து செயல்படும் R. நாகசாமி, இரு மொழிகளுக்கும் இடையே மோதலையும் வெறுப்புணர்வையும் தூண்டுகிறார் என்றே சொல்ல வேண்டும். இவ்வாறு தமிழ் மொழியை இழிவுபடுத்தும் வகையில் தொடர்ந்து செயல்பட்டதன் மூலம், தமிழறிஞர்கள் மற்றும் பொதுமக்களின் கண்டனத்திற்கு ஆளாகியுள்ளார். உ.வே.சா., பாரதியார் போன்றோர் பிராமணர்களாக இருந்தாலும், மொழியைப் பற்றிப் பேசும்போது நடுநிலையுடன் உண்மையாக நடந்துகொண்டனர். இவ்வாறு உண்மைக்கு ஆதரவாக நின்று, தமிழ் மொழிக்குத் தொண்டாற்றிய பல பிராமணர்களும் இருந்துள்ளனர். ஆனால், R. நாகசாமி உண்மைக்குப் புறம்பான ஆய்வுக் கட்டுரைகள் மூலம் தமிழ் மொழியை இழிவுபடுத்தி வருகிறார். இது தமிழ் மொழியின் மீது தொடர்ந்து நடைபெற்று வரும் கொடூரமான தாக்குதல் என்றே சொல்ல வேண்டும்.

அதுமட்டுமின்றி, தமிழ் மொழியின் வளர்ச்சிக்குக் குறைவான அளவில் நிதி ஒதுக்குவது, தொல்லியல் ஆய்வுப் பணிகளை முடக்கி வைப்பது, முடிந்த ஆய்வுப் பணிகளின் முடிவுகளை வெளியிடாமல் இருப்பது, தமிழ் வரலாற்றையும், ஊர், நகரம், தமிழ்க் கடவுள்களின் பெயர்களையும் சமஸ்கிருதமயமாக்குவது, மும்மொழிக் கொள்கையின் மூலம் இந்தித் திணிப்பு போன்ற முயற்சிகள் ஒன்றிய அரசு மூலம் தொடர்ந்து நடைபெற்று வருகின்றன. இவ்வாறு செய்வதன் மூலம், தமிழ் மொழியையும் தமிழர் வரலாற்றையும் கொஞ்சம் கொஞ்சமாகத் திசைதிருப்பி அழிக்கும் கரையானாக சமஸ்கிருதம் செயல்படுகிறது. நாம் உண்மையான வரலாற்றை பல்வேறு நிலைகளில் ஒப்பிட்டு, சரிபார்த்த பிறகே ஏற்றுக்கொள்ள வேண்டிய கட்டாயத்தில் இருக்கிறோம். ஆகையால், இத்தகைய சமஸ்கிருதத்திற்கு ஆதரவாகச் செயல்படும் நபர்களையும், அவர்களது கருத்துகளையும் புறக்கணிக்க வேண்டும். உண்மையான வரலாற்றை கல்வெட்டுகள், செப்பேடுகள், சங்க இலக்கியங்கள், ஆதாரபூர்வமான தொல்லியல் ஆய்வு முடிவுகள், நடுநிலையுடன் உண்மையான வரலாற்றை மட்டுமே பதிவு செய்யும் வெளிநாட்டு அறிஞர்களின் நூல்கள் ஆகியவற்றின் மூலமே நாம் தமிழர்களின் மற்றும் தமிழ் மொழியின் வரலாற்றை ஏற்றுக்கொள்ள வேண்டும். அந்த உண்மையான வரலாற்றை இந்தியா முழுவதற்கும், பிற நாடுகளுக்கும் நாம் கொண்டுசேர்க்க வேண்டும். வரலாறு என்பது கடந்த காலத்தின் பதிவு மட்டுமல்ல; எதிர்காலத் தலைமுறைகள் தங்களைப் புரிந்துகொள்வதற்கான அடையாளமும் ஆகும். எனவே, உண்மையைத் தேடி, ஆதாரங்களைப் பாதுகாத்து, தமிழின் வரலாற்றை அடுத்த தலைமுறைக்கு முழுமையாகக் கொண்டுசேர்ப்பது நம் ஒவ்வொருவரின் பொறுப்பாகும்.

புதுப்பிக்கப்பட்ட தேதி: 28-09-2026

| © 2026 தமிழ் தக்கார். அனைத்து உரிமைகளும் பாதுகாக்கப்பட்டவை.

தனியுரிமைக் கொள்கை